中產

http://hk.news.yahoo.com/牛肉或高達-扶貧共識要清晰-230000773.html

今日 yahoo 新聞有呢一篇, 討論最近電視訪問基層新移民家庭, 他們一邊訴苦沒錢買牛肉，卻因家中幾盒高達模型也被攝入鏡頭，而掀起網上「有幾窮」熱議.

我有一個朋友話, 訪問貧窮家庭, 問佢窮唔窮, 佢梗係話窮架啦, 正如我朋友住將軍澳, 就算一d味都冇, 如果有人關於將軍澳起垃圾堆填區, 訪問佢覺唔覺得臭, 佢話佢都會死都答左臭先架啦. 呢個講法幾好笑, 又好誠實. 我成日都話人係自私既, 並唔係話呢個世界冇好人,不過有幾多人會好大公無私咁話, “我屋企係窮, 不過仲有好多人窮過我, 你要扶貧扶左佢地先” 咁呢? 應該係好少數.

我冇睇過呢個電視節目, 亦唔係打算 comment 到底 “有高達模型冇牛肉” 有冇問題. 我認同呢篇報導話 “憑幾盒模型來質疑有關家庭的收入及生活水平，固然武斷也不合理，模型來源可能來自購買，或來自送贈，也未可知”. 我亦認同 “窮人有權也有自由用錢買高達玩具，這不是道德問題，也不是家計問題，而是人生的選擇問題”.

我想討論的, 是報導中探討的 “為何對於窮人家中有盒模型，也掀起風波，則背後反映的，卻又是甚麼？是甚麼才算窮？是市民對近年扶貧有否被濫用的懷疑？是中產對現狀不滿的另類抒發、還是有更深層原因?”

除左唔好咖啡唔多睇法國電影之外, 我估我係一個中產. 特別係最近睇到新聞報導, 話花旗銀行訪問 (好似) 千幾個年輕 “中產”, 而報導話佢地平均月入有二萬幾… 如果個 range 咁大, 我都唔敢話自己唔係中產啦下麻?

其實對於扶貧, 我覺得一個政府係應該做的. 只不過, 我相信香港好多中產會同我一樣, 每年交多多稅, 但又負擔唔起買樓, 或者供樓供得一點也不輕鬆, 眼見有仔女既朋友又要死慳死抵供養仔女入 play groups 讀好學校去遊學團等, 但另一方面又因為過唔到資產審查而在政府方面得不到任何 benefit. 我覺得, 從政府方面得到的, 唯一的好處就係香港稅率仍然較其他國家低.

係咁既情況下, 相信不少中產可能同我一樣, 覺得自己成為中產也是經過自己一番努力以及付出, 在政府方面得不到什麼也要自己靠自己, 問心無愧; 係咁既情況下, 中產用同一套 standard 覺得o個 d 自己唔努力或唔夠努力而等人幫既人係咎由自取亦尚算情有可原; 係咁既情況下, 我估中產不滿政府也有他們的理由; 係咁既情況下, 中產對於弱勢既政府成日 “立亂” 扶貧而不滿也不是很出奇; 係咁既情況下, 中產會覺得 “窮人發窮惡” 也不能算是奇聞.

可能係工作或身邊朋友職業的關係, 我聽過很多人呃綜援的故事. 舉例有領綜援家庭的妻子聲稱家暴去醫院, 全身得幾條抓痕話呢度痛o個度痛, 到免費做晒全身檢查之後就話唔告個老公, 順便做埋 body check. 又舉例有綜援人士一年向政府 claim 錢買7副眼鏡, 原因就梗係有好多, 例如跌爛坐爛近視加深等. 再來有大家都知既海瀟鴛鴦領綜援一年去7, 8 次旅行. 仲有好多由社工教唆簽 “衰仔紙” 話唔供養父母而令父母領更大額綜援的例子…

我唔係要歧視領綜援人士, 因為真係有好多家庭係需要人幫助. 不過大家唔好唔記得, 當經濟唔好, 好多人要比人減人工既時候, 綜援唔駛減 (大家估下如果政府叫領綜援家庭同香港一齊 “共渡時艱”, 係咪暴動都有份先? ). 到經濟好既時候, 我地呢d 用自己血汗賺錢既人都尚且只有 discretionary bonus (即係都未必有, 有既都係因為你做到隻狗咁), 點解領綜援既就大大聲聲要政府同佢地分享經濟成果, 領綜援人士竟然可以有第十三個月糧???

(為免出錯, 剛剛上網 search 了 “減綜援” 一下, 發覺上一次減綜援似乎係1999年, 即係話香港經歷沙士同雷曼兩次咁差既經濟氣候綜援都冇減到, 反之就有好多非綜援家庭當時都要負資產!! 如果我資料有錯, 錯怪領綜援人士, 歡迎告訴我)

如果話香港既綜援金額已經不合時宜, 綜援人士真係需要多些少錢, 冇問題政府應該檢討綜援金額, 如果你合附資格既 (i.e. 真係咁窮) 咪領取多番些少 lor? 領綜援既, for whatever reason 應該都係o個 d 冇工作既人, 即係對香港o個一年經濟成果冇貢獻. 政府應該要扶貧係一件事, 你冇貢獻仲要 “獎” 你第十三個月糧, 跟住仲要呢樣要o個樣咁惡, 我地 d 乖乖交稅變相要幫手養你既人, 睇你唔起甚至反感亦屬好正常.

可能有人會覺得我冇同情心 (我澄清我助養左中國同印度共兩個小朋友已經有6, 7年, 因為人地係窮到冇飯開o個隻), 但係我相信呢個世界冇 free lunch, 成日覺得自己慘等人打救既人係可悲亦係可恥既, 但係佢地今時今日反而越黎越惡. 中產同有錢人, 不排除有二世祖 (我唔係), 但係有錢唔係罪, 亦有好多唔係二世祖, 自己努力賺到錢既更加應該尊重. 我未有仔女, 不過我身邊既朋友, 辛辛苦苦慳錢養仔女既大有人在, 你地一個唔該話自己仔女輸在起跑線, 就竟然要求政府比埋錢你地既仔女去遊學團去玩課外活動, 咁會唔會已經超越左 “扶貧” 既基本意義? 會唔會你係已經要求緊社會上既中產同有錢人同你地 “共(佢地既)產”??

其實呢 d 人可以試下同政府講, 城中富豪既仔女自小有遊艇出海玩, 不如叫政府每一個貧窮戶送一艘遊艇啦, 如果唔係又輸在起跑線架啦.

好一位林老師

有關林老師既新聞, 我一直都知, 但段片我係因為昨天旺角咁大件事先睇返. 片長約5:30, 一開始一位阿 Sir 叫林老師離開, 要解釋既話去到警署會解釋. 期間該阿 Sir 與一位白衣 Madam 既態度我覺得可以好些少, 不過又未至於太過份. 1:50開始o個位白衣 (似乎較高級) 既阿 Sir 開始解釋, 態度非常良好 (呢位阿 Sir EQ 勁高!!). 2:27 開始林老師唔再聽白衣阿 Sir 講野, 指住一開始叫佢離開既阿 Sir 同 Madam 鬧. 2:56 林老師似乎開始有些少情緒失控, 鬧 “八婆, 八公, 賤人, WTF” 而其間白衣阿 Sir 一直嘗試繼續解釋及叫林老師 “冷靜少少”. 3:32 開始林老師重覆指警員係公安, 白衣阿 Sir 冷靜地重覆自己係香港警察林老師堅持佢係公安. 4:07 白衣阿 Sir 叫林老師既老公 “你可唔可以叫你老婆冷靜少少” 既時候, 林老師回答 “我老公同我一樣咁顛架”. 之後警員不再理會林老師. 警方既權限去到邊我未有 research, 但我偏向相信警方執法期間, 唔比林老師入去o個個範圍, 應該會有根據. 如果警方冇權既, 咁平時警方用條膠條封起一個範圍 (假設係公共地方既案發現場), 我都好肯定d記者會衝左入去啦! 至於需唔需要現場先同林老師解釋左, 才再有權趕佢走, 我又偏向相信唔需要, 因為如果需要既話, 咁個個都衝入去, 然後要逐一解釋先可以趕佢走, practically speaking 警方仲點維持秩序呢? (如果有人知原來警方係必須先解釋才可趕林老師走, 歡迎話我聽, 又學多一樣野) 從片段看來, 我覺得林老師的確看似 “情緒失控”. 可能佢平時係一個好既老師, 可能佢平時情緒控制得好好. 不過我覺得, 一個家長, 如果仔女係林老師既學生, 睇完呢段片而有所擔憂既話, 都好正常呀?! 本來, 我覺得呢單野應該只係比人網上瘋傳下, 林老師最多比人笑下佢係顛婆 (拿係林老師自己承認自己老公同佢一樣咁 “顛”, 咪話我誹謗佢), 應該就完. 講句公道話, o個兩個警員都有阿媽生, 林老師鬧人地 “八婆, 八公, 賤人, WTF” 就真係佢唔岩. 不過, 林老師道左歉, 呢件事應該完結. 你問我, 反對林老師o個班人有冇政治考慮, 我覺得有, 係借題發揮. 先將呢班人當係支持政府既, 下稱 “支持派”. 而支持林老師o個班 (當係反對政府既人, 下稱 “反對派”), 我亦覺得係有政治考慮 – 因為支持派借題發揮聲討林老師, 所以反對派必須企出來聲援林老師. 老老實實, 我唔太喜歡呢個政府, 早幾日收到稅單先 “媽媽聲” 到底交咁多稅我係政府度得到d乜? 但係, 近年我越黎越討厭反對派, 唔係因為我喜歡中共, 唔係因為我喜歡港府, 而係因為反對派過份地唔理性同埋反對既手法我好唔認同. 多個事例呢度唔多講, 討論返呢一件事, 不論有冇政治因素, 支持派o個班都係香港人, 當中亦有可能真係有d 冇政治考慮而只係聲討林老師既人. 咁人地搭個台出黎, 你地班反對派其實有乜野權利去 “踩台” 呢? 反對派都係香港人, 一樣可以發聲, 咁你咪係人地對面搭多一個台 (當然事前應按法例申請集會), 同支持派唱反調 lor? 唔需要咁樣走上人地個台度搞破壞呀? 反對派集會, 如果比人踩場, 應該會非常高調大大聲咁話比人打壓言論自由. 到人地支持派去集會, 你地反對派就去打壓人地既言論自由. 呢d其實咪就係反對派令人不屑既地方 lor. 都係o個句, 咁反對派同佢地最憎既中共有咩分別? 咪又係 “得你講冇人講”? 澄清一下, 如果反對派尋日係支持派對面和平集會, 如果冇踩人地個台, 如果冇去專登搞人地, 我係覺得冇問題既, 因為大家都有和平集會既自由. 不過我係覺得反對派成日得個惡字, double standard, 又成日無意或刻意犯法, 的確會教壞細路. 至於反對派講埋晒d “擇善固執” 之類既解釋 (例如 “因為法例係惡法所以就要專登去犯法”) 我覺得係歪理, 因為我唔覺得佢地一小撮人 (哪怕有一百萬人好冇?), 就有資格去決定邊一條係惡法, 邊一條唔係惡法. 有朋友話大家有唔同既 value 有唔同既支持者 (this I agree), 我冇需要去批評反對派. 如果反對派唔好成日咁高調犯法同埋去批判 (佢地o個d我覺得已經唔止係 “批評”) 支持派, 同埋唔好咁惡, 其實我都唔會對佢地反感.